【Now新聞台】截至早上11點，1小時內《彭博》用戶關注度上升最多的港股，依次為中國平安、新世界發展、恒大物業、太平洋航運及中國恒大。
平保今朝低開後，跌幅不斷擴大，曾挫約8%，低見52.8元，跌至近4年低位。早前外電報道，銀保監查平保房地產投資，又禁止佢出售同房地產相關嘅另類投資產品。花旗估計，平保整體房地產風險敞口達1855億元人民幣，不禁令投資者擔心向下風險大。
大華繼顯執行董事梁偉源指，平保過去1年做咗好多房地產相關嘅「拯救行動」，但利差損近800億人仔，加上新業務發展唔理想，同埋本業、房地產相關投資減值問題，嚇到投資者紛紛沽貨離場。
不過，Steven話，持有平保嘅投資者可以再等一等，因為今日跌幅都幾大，一旦平保反彈，可以考慮沽出，換馬至其他內險股，如中國太保(02601)、中國人壽(02628)等，甚至可以考慮友邦保險(01299)。
