【A&M Diary】如果你未食過拿督星馬大飯店，就真係唔好話你喺觀塘返過工呀！拿督星馬大飯店位於觀塘碼頭熟食市場，每日只係做午市，所以大部份嚟幫襯嘅都係觀塘嘅上班族。加上拿督星馬大飯店價錢抵，食物又充滿南洋特色，好多傳媒都報導話好好味，所以A姐今日就同埋班同事嚟拿督星馬大飯店試試啦！
黑胡椒魚餅
魚餅即叫即煎，所以上枱嘅時候夠晒熱辣辣。魚餅煎得香口，魚味濃香，食嘅時候無骨，而且加入唔同嘅香料，所以味道好有層次。
白灼怡保芽菜
怡保出產芽菜，而餐廳亦標榜芽菜由怡保空運抵港，所以芽菜飽滿，又爽又甜。
海南雞飯
海南雞係拿督星馬大飯店嘅代表菜，雞南雞嘅份量好多，肉質嫩滑，但我哋就略嫌雞皮肥咗啲。至於油飯同平時嘅好唔同，因為加咗香茅、雞油同薑去煮，所以飯嘅顏色偏深色，但味道就好濃好香，超好味！
燒豬頸肉胡椒湯摻摻
呢碗嘢嘅賣相確實麻麻，但味道真係唔錯！個胡椒湯嘅胡椒味超濃，落足料，冬天食就最啱啦！至於摻摻即係米粉加油麵，兩種麵底一齊食，口感豐富之餘，仲非常索湯。不過，豬頸肉就好硬好嚡，大家嚟食嘅話，就唔好揀豬頸肉喇。
