【A&M Diary】等咗4年，香港迪士尼樂園嘅煙花終於返嚟喇！作為「迪粉」嘅我哋，真係勁期待呀！今次全新嘅迪士尼煙花匯演叫做「迪士尼星夢光影之旅」，配合水幕投影、燈光、激光、噴泉、火焰同煙花等效果，將40個迪士尼同彼思嘅經典故事同音樂重現眼前！一齊睇睇「迪士尼星夢光影之旅」嘅攻略啦！
經Klook買迪士尼樂園門票可享門票優惠：詳情
奇妙夢想城堡
迪士尼樂園嘅地標當然係城堡啦！香港迪士尼樂園經過幻想工程師嘅重新打造，變成融合咗13個公主同女王故事嘅奇妙夢想城堡，包括《公主與青蛙》嘅蒂安娜、《睡公主》嘅奧蘿拉、《小魚仙》嘅艾利奧、《花木蘭》嘅木蘭、《阿拉丁》嘅茉莉、《雪姑七友》嘅白雪、《魔海奇緣》嘅慕安娜、《仙履奇緣》嘅仙蒂、《勇敢傳說》嘅梅莉達、《風中奇緣》嘅寶嘉康蒂、《美女與野獸》嘅貝兒、《魔髮奇緣》嘅樂佩同《魔雪奇緣》嘅愛莎。至於今次迪士尼星夢光影之旅就係喺奇妙夢想城堡進行。
迪士尼煙花：「迪士尼星夢光影之旅」最佳觀賞位置
迪士尼樂園有唔同嘅設施，但大家記住攞定樂園時間表，預留時間喺最佳位置欣賞「迪士尼星夢光影之旅」呀！因為今次嘅「迪士尼星夢光影之旅」會有水幕投影同噴泉嘅效果，所以奇妙夢想城堡前嘅空地就最適合喇！但如果你有長鏡頭，又想拍攝整座奇妙夢想城堡嘅話，就可以去到美國小鎮大街火車站嘅樓梯啦！
迪士尼煙花：「迪士尼星夢光影之旅」故事章節
全新「迪士尼星夢光影之旅」分為7個章節，20分鐘嘅故事透過水幕投影、音樂、燈光、激光、噴泉、火焰同煙花等效果，將40個迪士尼同彼思嘅經典故事，以及150位迪士尼朋友故事情節，帶領大家由誕生一刻，經歷生命中嘅成長故事。
1. 誕生之時：以《泰山》嘅卡娜同小泰山、《小飛象》嘅大寶、《玩轉腦朋友》嘅韋莉等迪士尼朋友，帶出人生最天真、最純潔嘅小時候。
2. 無憂之時：以《小飛俠》嘅小珠、《魔雪奇緣》嘅安娜同愛莎、《獅子王》嘅小辛巴等迪士尼朋友，帶出嬉戲、跳舞和狂歡嘅無憂童年時刻。
3. 蛻變之時：以《魔海奇緣》嘅慕安娜、《優獸大都會》嘅朱迪、《大力士》嘅海格力斯等迪士尼朋友，帶出成為年青人嘅蛻變，敢於嘗試嘅時刻。
4. 永恆之時：以《阿拉丁》嘅茉莉公主同阿拉丁、《小魚仙》嘅艾力同艾莉奧、《魔髮奇緣》嘅樂佩等迪士尼朋友，帶出醉人浪漫、甜蜜珍貴嘅愛情故事。
5. 考驗之時：以《公主與青蛙》嘅霍博士、《獅子王》嘅刀疤、《雪姑七友》嘅邪惡皇后同白雪公主等迪士尼朋友，帶出人生總會遇上挑戰和障礙，但大家唔可以放棄夢想，要有決心同堅持嘅勇氣。
6. 懷緬之時：以《玩轉極樂園》嘅米哥同阿德、《沖天救兵》嘅小飛同卡叔等迪士尼朋友，帶出人生遇上起伏嘅時候，總會有啲人喺你身邊陪伴同勉勵你，回想幫過你哋嘅人，並對佢哋表達謝意。
7. 活在當下、時刻銘記：其實每個迪士尼朋友都經歷充滿冒險、愛情及友誼嘅迪士尼故事，呢啲故事絕對係生命中不可或缺，陪伴我哋成長嘅重要時刻。
迪士尼煙花：「迪士尼星夢光影之旅」夜光主題商品
為咗配合「迪士尼星夢光影之旅」匯演，喺迪士尼樂園嘅商店亦推出一系列嘅夜光主題商品，例如發光頭箍、飾物以及有反光效果嘅T恤，帶住夜光主題嘅商品欣賞迪士尼煙花匯演，就更加投入啦！
迪士尼煙花：「迪士尼星夢光影之旅」主題美食
另外，喺迪士尼樂園嘅餐廳亦推出多款主題美食，其中火箭餐廳就推出全新甜品自助餐，每一款嘅甜品都非常趣緻，啱晒鍾意食甜品又鍾意打卡嘅你！
