【Viu】Sammi鄭秀文噚晚完成一連8場澳門演唱會， 每晚演唱會嘅「眼淚系列」環節，現場螢光幕都會播出一段Sammi同林保怡嘅劇場做引旨，兩個人噚晚終喺舞台上合體唱國語歌《演員》，正啊！
林保怡今次做Sammi個唱嘉賓，佢透露有大概10年冇喺舞台上唱歌，Sammi就話：「超過十年？大家真係好有福氣。其實我同保怡私底下有聯繫，會約出嚟食飯見面，我哋好啱嘴形，好好傾！」林保怡回應話：「我諗係緣份！」
Sammi透露會向保怡請教演戲，亦好欣賞對方嘅生活態度：「佢真係好down to earth（貼地），平時湊吓狗仔、買吓餸、格吓價，令我真係變咗師奶，知道邊度買嘢平！」喺Sammi落台換衫時，保怡喺台上話： 「大家有冇諗過我嚟做嘉賓會唱咩歌？例如『如果⋯⋯』。」觀眾以為佢會唱《年少無知》，佢就好鬼馬咁講：「如果⋯⋯太多牛奶味」，之後佢就唱出英文歌《Better Man》。
Sammi喺encore時繞住場唱《不要驚動愛情》，當佢見到積極抗癌嘅吳忻熹（前名吳文忻）有份睇騷時，佢即刻停低腳步向住對方唱歌，唱到「這份情像翅膀打開」時，就指住吳忻熹話：「加油，唔使怕，天父愛你！」到Sammi唱到「生老病死 一起細數」後，握實拳頭向吳忻熹講一聲「加油」，Sammi仲一度哽咽抹眼淚，場面感人！
熱情嘅觀眾們繼續嗌encore，Sammi喺大會收起晒咪、音響器材嘅情況冇得唱歌，就跑勻全場向四面台觀眾揮手道別、鞠躬致謝！Sammi喺慶功宴上繼續Hyper，仲接受台前幕後嘅掌聲！
