【Viu】林峯一連七場紅館個唱今晚嚟到第5場，小編同網友最期待嘅畫面終於出現喇！林峯邀得老拍檔鍾嘉欣任嘉賓，促成「世紀CP」管家仔程亮同常在心相隔十幾年後再度同台演出，二人先合唱《馴獸師之王》，嘉欣一升上台已經感動掩面，「露營必須酒」後，林峯即程亮上身話：「沒有常在心的7千9百天！」嘉欣終於忍唔住爆喊，阿峯馬上衝去台邊拎紙巾幫嘉欣抹眼淚。當嘉欣高呼同阿峯已經十幾年冇見面，仲話當年22歲識佢嗰陣，已經知道阿峯係Super Star，搞到阿峯都差啲忍唔住喊，場面感人！
其後二人冧爆合唱半首經典劇集歌曲《心領》，回憶殺滿滿，令全場觀眾瘋狂尖叫！嘉欣仲話希望可以有機會喺紅館開騷，仲勾手指尾約定阿峯做嘉賓，當阿峯落台換衫時，嘉欣即「常在心」Mode大讚阿峯嘅笑容由始至終都咁冧，好「Alfred（程亮英文名）」咁話！
世紀合體過後，阿峯換上銀色造型唱出一系列劇集金曲，仲行匀四面台同觀眾握手，十足萬人唱K大會呀！此外，姜大衛、李琳琳、連炎輝、胡楓、余香凝、周家蔚、文頌嫻、梁靖琪、謝天華同太太都有捧場！快啲睇現場實況啦！
