【Viu】資深演員周驄（原名冼錦榮）於本月4日因肺炎病逝，享壽92歲，今日喺世界殯儀館設靈，靈堂佈置簡潔，中央放置驄叔嘅彩色遺照，橫匾寫上「福壽全歸」，喪禮採用道教及維新教儀式。
縱橫演藝圈逾60年嘅周驄，在電視台有「御用爺爺」之稱，人緣甚好，現年90歲嘅羅蘭仲冒住風雨、撐住枴杖，由KK張國強攙扶下到靈堂送別老朋友。其後羅蘭姐由KK同曾醒明陪同下受訪，佢話由廿幾歲就認識驄叔，由粵語片拍到電視劇，仲哽咽表示好唔捨得老友，但生死有命，仲話：「所以在生一日都要做好自己！」並叮囑大家保重身體！
鍾志光受訪時透露一直有去醫院探驄叔，直至對方離世前一日都有探望，佢話驄叔起初入院時精靈活潑，不但可以坐起身睇報紙，仲不斷講波經，同埋分享以往同謝賢拍粵語片嘅趣事，可惜後期情況轉差。鍾仔大讚驄叔好人零架子，拍劇時從來冇嫌棄自己係講波佬，仲話前輩向來樂觀，冇聽過佢有咩遺憾咁話。
至於白茵、吳雨、陳慧珊、鍾志光、羅樂林、曾醒明、黃文慧、田啟文等亦有到場致祭。而一眾圈中好友同後輩亦有送花圈敬輓，包括曾合作《新紮師妹》嘅吳彥祖同楊千嬅、影帝古天樂、林家棟、汪明荃同羅家英、胡楓、羅蘭、薛家燕、夏雨、李司棋、黎耀祥、羅嘉良、林峯、黃宗澤、吳卓羲、宣萱、唐詩詠等，其中久未露面嘅關菊英亦與同性好友周偉利聯名送上花圈。
