【Viu】陳慧琳一共10場《陳慧琳Season 2萬人結界演唱會》噚晚嚟到第8場， 之前一直努力控制情緒嘅Kelly，終於忍唔住爆喊！Kelly喺唱《最佳位置》時，當舞台天橋升起，佢突然發現前唱片公司嘅一班舊同事坐喺台下， 佢話：「哎呀！啲舊同事，見到你哋又喊……冇你哋就冇呢隻歌，多謝晒！我哋一齊打拼返嚟……你哋突然出現，殺我一個措手不及。」
Kelly好快抹走眼淚，迎接嘉賓阿Kay謝安琪！兩人合唱《囍帖街》後，Kay話最難忘嘅係同Kelly喺一個週年演唱會上一齊唱跳：「我自己從來都冇跳唱天份， 亦都唔會挑戰，喺嗰次認識到跳唱係需要天份！Kelly好簡單就跳完唱完，我就跟得好辛苦。」Kelly話其實係功多藝熟，並指自己以前都唔識跳，兼提議整一首歌係由Kay跳舞、自己負責唱！
Kay仲爆多年前一次錄節目，意外發現Kelly嘅廚藝天賦： 「當時要煮海鮮，仲要處理隻蟹係好生猛，我哋要劏蟹。點知Kelly好熟手，仲教我點開邊！我就好驚訝，同同事講：『以為Kelly唔入廚房』，點知佢哋話：『你俾把刀佢，佢連成隻雞都識斬！』」Kay再大讚Kelly係完美！Kelly即興提議話：「不如我哋搵鍾珍（Kelly 經理人）開部戲，叫埋你老公（張繼聰），拍套笑片《殺夫記》，我劏雞咁叻，啱晒！」
另外，原定7月20日嘅場次受颱風影響而延至27日舉行，Kelly喺台上話本身都抱住一絲希望，盼望當日晏晝4點前改掛三號風球，可惜最終事與願違。 Mark雷頌德就話：「通常演唱會改期，歌迷會鬧爆，但Kelly嘅fans反而好開心，因為原本買唔到尾場飛嘅人，而家變成真尾場！」Kelly指：「真係唔好再改期，個嘉賓重量級。」Kelly亦多謝夏紹聲讓咗啲時間俾佢哋，仲話如果再受颱風影響，就同夏紹聲一齊唱！
之後，Mark、單立文同Joey Tang搞笑提議嚟一個《萬人空櫈結界演唱會》，由夏紹聲唱《花花宇宙》，Kelly唱《空櫈》！Kelly仲好鬼馬即場模仿夏紹聲嘅磁性低音演繹《空櫈》，Joey Tang就以超低音唱《花花宇宙》，場面搞笑！
