【Viu】撈米嚟啦！今日舉行嘅《Hi MIRO! 見面祭2025》係「95Line」Anson Lo、Jeremy孖住上陣！「撈米」以王子Look現身，一出場已經令在場粉絲們嗌破喉嚨，氣氛超好！
「撈米」亦有喺台上盡訴心中情，Jeremy大讚阿撈係一個好sweet嘅人，譬如阿撈知佢唔開心就會即刻訊息關心佢。之後二人合唱《Money》，勁合拍！佢哋分別都有唱各自嘅作品，《滿》同《你都有今日》，用溫暖歌聲陪住大家！
Anson Lo喺唱《你都有今日》前話：「大家入到嚟今日呢個Fan Meet，你哋都有今日啦真係，好好彩啊！」講到下一首歌，佢就話：「噚晚就剪咗5個鐘MV，《Hey Hey OK! 》就連續7個鐘。今次係剪MV時間最少嘅一次，大家都一齊進步。嚟緊出嘅一首新歌係跳唱歌，一如以往，同《你都有今日》係完全唔同風格、完全唔同主題。主題就劇透少少，就係同頭先我哋傾過嘅計有關。 」阿撈話可以用一個表情去形容歌名，之後佢就做出「見牙唔見眼」嘅表情，台上有粉絲話肉緊、痴身、火辣、觸電等等，阿撈就再補充：「我都覺得肉麻嘅，都想痴身 。我畀多個貼士大家，同味蕾有關，應該8月頭就會出街！」
「撈米」亦有喺台上齊齊舉起酒杯同大家祝酒，然後同台下粉絲們分組影大合照。「撈米」 同主持旁白君喺台上玩問答Game互相爆料，但聽啲答案都FEEL到爆得好有愛好sweet嘅，旁白君問Jeremy：「Anson Lo係唔係一個㒼塞嘅人？」Jeremy即話唔係，又話就算㒼塞都冇咩問題：「堅持係有嘅，但堅持係唔屬於㒼塞 。佢噚晚先去剪完MV，佢好堅持參與去剪，係佢對於自己作品嘅堅持。」阿撈話自己係會拎中間點，係會堅持自己嘅要求。
阿撈就被問到Jeremy係唔係一個心急嘅人，佢就話唔係，仲大爆Jeremy旅行時會比佢早2個鐘起身，亦唔會催促佢。旁白君再問「米撈」：「若然大家係有拍拖，佢會唔會係一個痴身嘅人呢？」Jeremy先答：「我覺得佢一定係勁痴身，係分唔開。因為佢平時對住我哋都係一塊膠布，第一下見面就攬。」阿撈直認自己係痴身：「我本身鍾意人與人之間嘅肢體接觸，攬、搭膊頭係好有力量。」阿撈就覺得Jeremy係唔痴身：「佢內心係好需要人畀attention佢，我覺得佢係要但唔會講出口，如果佢冇得到attention同愛，佢就都無所謂、順其自然」，Jeremy聽完都表示認同。
