【Viu】聽日就係皮皮Frankie陳瑞輝嘅生日，FRANKIE CHAN FAN CLUB噚日提前搞咗個派對慶祝，並以「Step by step: The Dance Journey 」做主題賀皮皮37歲！壽星仔甫進場，數百個皮寶寶即大唱生日歌，Frankie興奮到同粉絲們High Five，氣氛相當熱鬧！
席間，Frankie同粉絲玩「猜猜畫畫」之餘，仲齊齊影合照，相當寵粉！佢又提到同「FING小組」開完騷之後心態放開咗好多，「表演或者唱歌自己都放開咗好多，都落咗好多苦功，以後都會唱得更加好！」隨後，粉絲又播放應援片段同Frankie歷年精彩演出，以及為壽星送上精美大蛋糕， Frankie感觸稱：「大家教識我好多做人道理，希望有互補嘅關係，希望同大家一齊進步。」
最後，Frankie又透露生日願望，「過咗W.T.F.之後，發覺大家無論喺台下或者喺外面支持我，其實我都Feel到。今次我點解覺得係一個Breakthrough，因為有大家支持，我每次上到台都覺得可以比Rehearsal表現得更好，因為有大家喺背後Push同Support我，令我有呢個勇氣做呢樣嘢。我希望呢份勇氣可以帶俾大家，令大家都有勇氣做一啲大家都好想衝破，或者一直都好想做到嘅嘢！」而第二個生日願望，Frankie表示：「希望大家身心健康！」
現場實況： Frankie 37歲生日獲數百皮寶寶提前祝賀 為唱歌表演下苦功 承諾以後唱得更好 生日願望：「希望將勇氣帶俾大家！」
