【Viu】MIRROR「妹豬組」姜濤、Anson Lo 盧瀚霆、Edan呂爵安同埋Jeremy李駿傑，今晚現身旺角麥花臣出席《呂濤米Lo Seoul》旅友旅途分享會，四位「Oppa」以學院風亮相，型到爆！
深情對話環節中，姜admin一一回覆姜糖嘅問題，佢透露 「十九胎」已籌備得七七八八，又表示會推出大家期待嘅語言同埋自己創作嘅歌曲。至於今年底舉行嘅Solo con，姜admin稱會同兩年前嘅《KEUNG TO 「WAVES」 IN MY SIGHT SOLO CONCERT 2023》演唱會作呼應。平時熱愛打籃球嘅姜admin表示解鎖咗新技能，最近一個月開始學打拳，笑指可以發洩咁話！而呢個「新牌仔」又稱揸車搵到屬於自己嘅空間，仲大爆有時會播住歌扮偶像劇添！
MC旁白君問到會送咩韓國手信俾Fans，Edan稱：「印象中冬天好凍，夏天買把風扇」。Jeremy稱買面膜：「一齊敷面膜落街，食宵夜！」阿撈就話會買生活用品同泡菜。而姜admin則霸氣話：「買張機票一齊去！」
之後「妹豬組」同Fans大遊戲，首先戴上耳機用韓文「估歌仔」，俾Fans鬥快估中。另外，四子又還原團綜嘅場景，進行煮部隊鍋比賽，再由8位美食家矇眼試食。佢哋用一貫作風將芝士、午餐肉等食材一嘢轟落個鍋度，實行快靚正！當中「澱粉之鬼」阿撈同Edan更睇到流晒口水，當眾偷食，Jap到津津有味！最後，由Edan同Anson Lo一組以5:3贏得比賽，而幾位勝出嘅美食家更可以「妹豬誇誇群」圍住祝福，真係幸福到暈！去到彩蛋環節，「呂執事」、「撈執事」、「姜執事」同「駿執事」親用匙羹餵食，當中溫柔嘅「駿執事」更服務周到 ，冧C大小姐！想感受現場有幾sweet？仲唔入嚟睇實況片！
影片來源：觀眾提供
