【Now新聞台】截至早上11時止，1小時內《彭博》搜尋量最多港股，依次為比亞迪股份、中國人壽、中國平安、泡泡瑪特(POP MART)及港交所。
泡泡瑪特股價今日(11日)先跌後升，一度升逾1%，升穿261元，摩根士丹利最新睇302元，又睇好集團北美、歐洲業務持續增長，現價距離大摩目標價仲有逾15%距離，係咪唔怕高追？
資深證券分析師彭偉新指，泡泡瑪特未來數年增長已price in喺股價，依家入市風險較大，雖然集團有好多知識產權(IP)，但只得1至2個IP可以帶嚟巨大增長，而IP需要keep到個勢頭，集團先可以攞到較高估值。Castor估計，若泡泡瑪特股價真係升到302元，之後未必再有上升空間。
