【Now新聞台】截至早上11時止，1小時內《彭博》用戶搜尋量最多港股，依次為金山軟件、藥明生物、港鐵公司、小米集團及泡泡瑪特。
金山軟件以科幻機甲為主題嘅射擊對戰遊戲《解限機》，下月初就會進行全球公測，摩根士丹利上星期出報告唱好呢隻game，呢隻game未做公測已經打入Steam平台願望清單5強，大摩估計，如果遊戲上市後喺Steam嘅全球排行榜入到前10，金軟股價有望升10%，不過，公司股價上周累升5%後，今日(16日)再炒高逾10%，到底係大摩低估咗呢隻game，還是炒過龍？
富昌證券聯席董事譚朗蔚指，其實都只係一個估算，將來嘅「課金」人數及活躍度等都係未知之數，但因為從公測結果知道《解限機》有好多人關注，亦係內地稀缺嘅遊戲品種，所以就惹嚟炒作。
Stevan又指，短線嚟講係有高估之嫌，因為金軟過往主攻辦公室軟件業務，手遊方面唔見有太多利好反應，股價喺短時間內升得咁急，唔建議冇貨嘅投資者追入，不過，有貨嘅投資者可以留意公測及市場反應，股價有冇機衝上42元，佢認為依家追貨已經太遲。
