【Now新聞台】截至早上11時止，過去1小時內《彭博》用戶搜尋量最多港股，依次為中國石油化工股份、美團、優必選、吉利汽車、中國石油股份。
今日(21日)有兩隻油股上榜，中石化股價升上近9個月高位，中石油更衝上1年高位，雖然國際油價冇太大起色，亦未有傳出重大利好消息，但股價今日(21日)雙雙造好，成交係過去20日平均5倍以上，點解讀今日呢浸炒作？
富昌證券聯席董事譚朗蔚指，油價冇大變動，紐約期油處於每桶68美元水平，亦未見傳出地緣政治或增產減產消息，今次油股上升，估計同「穩陣錢」入市有關，事實上，年初開始已見到唔少養老金、保險金等長線資金入市，專吼穩陣及高息股份，近期唔只油股，煤炭股都呈震盪上行格局，反映資金偏向揀高單位數收益嘅國企或央企。
Stevan又提醒，中石化已經追咗一浸，如果係睇中公司派高息而想入市，亦要考慮埋油價波動因素，佢認為，等股價落到4.3元水平再做部署比較好。
