【Now新聞台】截至早上11時止，過去1小時內《彭博》用戶搜尋量最多港股，依次為美圖公司、藥明生物、碧桂園、維立志博及快手。
美圖股價今早(25日)低開近1%後，跌幅一度擴大至逾10%，低見10元，大股東蔡文勝於周一(21日)減持400萬股，年初至今累計減持11次，之前一直減持都仲行緊升浪，點解釋今次會跌？依家係咪買入嘅好時機？
大華繼顯執行董事梁偉源指，大股東今次減持股數唔多，之前公司發盈喜後，股價曾升至11.5元水平，睇返公司基本因素，盈利都有改善，可能因為今日大市轉弱，加上傳出大股東減持消息，睇返今日跌幅，相信係短線獲利回套。
Steven又話，美圖業務配合到市場人工智能(AI)發展，跟得非常貼市，公司亦有一定技術水平，所以吸引到更多用戶，喺盈利繼續改善下，今次股價調整至10元水平，都係一個可以考慮買入嘅時機。
