【Now新聞台】截至早上11時止，1小時內《彭博》用戶關注度上升最多股份，依次為小米集團、石藥集團、老鋪黃金、眾安在綫及中升控股。
受季節性因素影響及補貼效應減弱，小米第2季智能手機出貨量跌4%，係咪股價兩連跌，今日(29日)更落到50天線嘅「死因」？
富途證券首席分析師譚智樂指，近期資金對科技股興趣唔大，北水及資金多數炒醫藥及唔同類型嘅話題性股份。小米股價4月底開始，一直企穩喺好靚嘅上升軌道，因此，佢認為今日下跌只係技術上向下突破，若今日收市仍然係1支大陰燭跌落嚟，企唔穩55元以上，先可以視為跌穿上升軌嘅訊號。
Arnold續指，小米將會喺8月19日出業績，放榜前股價會較為敏感，市場會用出貨量及數據預測業績，唔排除之後有更多負面消息，所以現階段不宜做部署，等股價回落至50元水平再諗。
