【Now新聞台】截至早上11時止，過去1小時內《彭博》用戶搜尋量最多港股，依次為中國石油化工股份、中國石油股份、美團、小米集團、香港電訊。
中石化發盈警，預告上半年最多少賺逾43%，原因係油價大跌，加上市場競爭及化工市場毛利低，拖累股價今日(1日)捱沽，呢啲負面因素下半年會唔會消退？油股屬於高息股，可唔可為股價帶嚟支持？
大華繼顯執行董事梁偉源指，油價今年變動唔大，但受美國總統特朗普(Donald Trump)嘅貿易政策影響，第2季比較波動，令煉油成本控制難度大咗，令煉油毛利受壓，加上石化產品需求減少，拖累盈利表現。不過，隨著美國貿易政策逐步落實，油價大幅波動嘅機會細咗，估計中石化經營環境會有改善。
Steven補充，現時油股息率約6厘至7厘，相比內銀股平均5.5厘，油股息口較吸引，加上市場上嘅高息股選擇唔算太多，油價又冇明顯下行壓力，相信油股仍有一定吸引力。
