【Now新聞台】截至早上11時止，過去1小時內《彭博》用戶搜尋量最多港股，依次為比亞迪股份、聯想集團、小米集團、中芯國際及新鴻基地產。
車企「內捲」問題繼續令市場憂慮，比亞迪出咗7月銷售數據，按年升唔夠1%，按月更跌10%，早前，股價突破唔到雙頂，即135元水平，股價就開始回調，今日(4日)一度跌至111.3元低位，挫逾4%後，喺低位有返啲買盤吸納，現價博反彈有冇得諗？
元宇證券基金投資總監林嘉麒指，每次有新能源汽車股股價出現調整，或銷售數據差，市場就會博反彈，過往當其他車企銷量較差時，比亞迪銷量仍然好好，不過，近幾年好多車企都減價促銷，小米汽車甚至要買家畀晒錢先可以驗車，呢啲都反映車企資金好緊張，加上早前有國策催車企「找數」，亦對呢啲公司現金流造成影響。
KK續指，投資者可能覺得比亞迪股價已自高位調整咗唔少，所以短線想博反彈，不過，彈幅會有幾多？會唔會繼續跌？全部都係不確定因素，比亞迪好快就出中期業績，佢認為，呢段時間反而唔應該博反彈。
