【Now新聞台】截至早上11時止，過去1小時內《彭博》搜尋量最多港股，依次為安踏體育，小米集團，美團，中國鋁業及友邦保險。
安踏昨日(27日)出咗第3三季營運數據，安踏品牌及FILA品牌銷售疲弱，值得留意係，繼8月之後，管理層再下調核心品牌銷售指引，最新估計全年銷售僅錄得低單位數增長，但第4季有「雙11」亦係傳統旺季，管理層仍再下調銷售指引，係咪意味對今季業績打定輸數？
富途證券首席分析師譚智樂指，其實唔止安踏，成個消費板塊嘅銷售喺「雙11」都冇出現爆發性增長，傳統消費行業如體育用品行業，低單位數增長應可以維持，但14倍市盈率(PE)嘅估值唔算平，呢個可能係導致股價過去1年弱勢嘅主因，佢坦言，要扭轉劣勢並唔容易。
Arnold又話，短炒安踏冇著數，但中長線或可以繼續睇好，加上安踏被下調目標價後，現價應有更多上升空間。
