【A&M Diary】平時唔食辣嘅M佬，終於鼓起最大嘅勇氣約A姐出嚟，因為我想面對住你，講出我心裡面想講咗好耐嘅說話，可惜嗰個落雨嘅晚上，嗰條好新鮮嘅鯇魚，嗰條好入味嘅薯粉，令我唔可以趕及係你食之前，親口對你講一句，你食緊粒指天椒呀！結果眼白白就睇住A姐食到噴火喇！我哋食緊咩？就係去到荃灣嘅川味雞烤魚大王食重慶麻辣烤魚！
小半條鯇魚重慶中麻辣
除咗鯇魚，你仲可以揀魽魚；而除咗重慶麻辣，你仲可以揀泡椒、剁椒同酸菜好味；仲可以因應你嘅耐辣程度選擇大、中、小辣！結果，我哋揀咗小半條鯇魚重慶中麻辣。2個人食小半條就係啱啱好，因為仲有quota食其他嘢添！上枱個刻已經有好香嘅花椒味，魚就先烤到半熟，再放落呢個麻辣湯底煮成！條鯇魚大大條，好新鮮，肉質好滑，而且無泥味又唔腥，最重要係麻同辣配得啱啱好，唔會話辣到無朋友！至於，隨魚配料方面，有蘿蔔、大荳芽、娃娃菜同酸菜等，都幾入味呀。
黑毛豬腩肉片
因為我哋對肥牛興趣不大，所以就以豬肉取替，豬肉味好濃，怕太肥膩嘅可以揀黑毛豬腩肉片！
皇帝菜
打邊爐就最鍾意食皇帝菜，因為除咗打邊爐，平時都無乜幾何可以食到。聽講，皇帝菜係專門進貢俾皇帝食而命名，但好多人都覺得，呢種菜有陣怪味，其實計我話齋，就係因為呢陣味，先好味！
薯仔、闊薯粉
想入味啲就一開始就放落去，咁先可以索哂啲精華，識食一定係咁食啦！
