【Now.com】YouTube 頻道 LGR 最近出咗條新片「I'm Back Film: Is it worth $800 to convert 35mm to digital?」，專門評測咗一件話題性極高、被稱為「現代怪奇硬體」嘅產品 I'm Back Film Kit。呢套裝置標榜能幫你「無痛」將原本嘅菲林相機，轉換成數碼相機，揚言「支援所有35mm相機」，究竟堅唔堅？表現同菲林差幾遠？
I'm Back Film Kit嘅核心，係一個外型類似35mm菲林嘅塑膠模組，裡面有一枚2000萬像素Micro 4/3感光元件。呢個「數碼菲林」可以放入傳統35mm相機，曝光落喺快門簾後面嘅數碼感光元件，而唔係菲林。
打開包裝，設計似巨型Kodak菲林，玩味十足。說明書就非常簡略，無詳細操作指引，安裝步驟細節要睇官方YouTube教學影片。理論上，佢支援幾乎所有35mm相機，主打「通用型」；同時可透過手機App遙控拍攝、設定參數與檢視影像，支援影相與4K錄影，主機上有1.5吋小螢幕顯示基本設定。
LGR實測近十種不同菲林相機，能成功安裝非常有限。最終採用「官方推薦」嘅 Olympus OM-10，先算順利正常完成安裝。
實際操作時，每次影相要先撳數碼背蓋上嘅快門，再快速撳相機本身嘅快門，結果會造成唔少錯位，或者做漏一個步驟，搞到影唔到。小螢幕操作亦比較遲緩，開機要等十幾秒先入到待機狀態影相。
操作扮菲林玩法，但成像效果都係數碼feel，色彩偏冷、紅色表現失真，同菲林色調落差好大。同時，由於感光元件尺寸小於35mm全片幅，所以鏡頭影像有好大裁切，視覺範圍比菲林窄好多，M4/3片幅基本裁切倍率就係兩倍，例如35mm鏡頭就變成等效70mm焦距。
低光環境下，畫面容易出現明顯noise，感光元件動態範圍有限，使用高iso時細節喪失。內建「菲林濾鏡」，宣稱可模擬Kodak/Fuji/Ilford等經典色調，但實拍色偏、光暈等問題仍難掩「數碼味」。
呢件玩具適合「追求復古操作手感，但不用菲林」嘅朋友，想feel下用菲林相機按快門、轉光圈、手動對焦嘅觸感，但完全唔介意畫質最終有無菲林質感，呢件產品有一定吸引力。但對畫質有要求，想要菲林味，成像本質仍然係數碼檔，sensor缺乏菲林獨有嘅寬容度同菲林層次。想玩菲林嘅朋友，都係正正經經買菲林！
另外，I'm Back Film售價唔平，原價800至900美元，Kickstarter售價約500美元，功能表現不似預期。想用舊鏡頭，LGR建議買轉接環仲方便，效果更好。
Photo / YouTube@LGR 影片截圖
