【Viu】香港樂壇模範夫妻林子祥、葉蒨文今晚起一連五晚唱爆紅館！囝囝林德信同老婆Candace喺開騷後，由工作人員帶到panel附近嘅位置，欣賞精彩演出！
「氣氛小組」阿Lam、Sally分別喺台嘅兩邊high爆登場，頭part就帶嚟串燒歌《十分十二吋》，一秒撻着全場嘅hyper mode，二人賣力邊唱邊跳仍中氣十足，唱家班果然係寧舍唔同，寶刀未老呀！期間Sally更即場喺台上quick change，驚喜送纖腰，不得不提Sally啱啱先過完64歲生日，keep得住呢副弗到漏嘅body，真係葡萄死人呀！
而呢兩公婆唔止唱得、跳得、仲talk得添！喺唱完串燒歌後二人同fans打招呼，Sally大晒巨型水樽禮物，笑話劉德華個水樽都係咁大個，不過阿Lam就自嘲係「駱駝」唔飲水，笑爆嘴！兩公婆又係咁耍花槍放閃，阿Lam仲爆埋Sally一開始當咗佢係馬來西亞人嘅笑料，而Sally就happy share阿Lam搵佢唱歌嘅往事！
跟住就係阿Lam嘅solo part唱《每夜唱不停》，喺唱《海闊天空》後，佢感觸謂唱咗歌50年，想知有邊位fans一直陪伴住佢，唱到中段更一度哽咽起嚟！
去到個唱嘅中後段，Sally大爆阿Lam喺佢生日正日，捧生日蛋糕出嚟嗰陣唔小心跌親，仲要係面朝下咁跌，撼親個鼻搞到成身血，嚇窒所有人！阿Lam即刻報平安笑話跌完個鼻唞氣仲暢快，同埋最緊要無影響開騷！
眨吓眼就去到encore環節，Sally換上一套粉紅戰衣出場唱《瀟灑走一回》，件大褸入面仲要係see-through透黑bra，禾稈冚珍珠！跳得興起Sally嗌話想除褸，老公阿Lam畀唔畀先？最後二人繼續同fans大合唱《敢愛敢做》，掀起是晚高潮！另外，台下睇騷嘅仲有蔡一智、朱玲玲同老公羅康瑞、拉姑、陳潔靈、導演賈樟柯、Deep同老婆郭思琳等，其中朱玲玲更帶埋「長炮」嚟影靚相添，堅係勁揪！依家快啲去睇實況片！
