【Viu】張家輝、胡杏兒、張兆輝、謝天華、Rosa韋羅莎、Thor駱振偉、肥腸同岑珈其等今日出席新劇《絕命法官》記者會，該劇嚟緊13號開始喺ViuTV播映，家輝哥喺台上接受一眾演員對「秦官」嘅控訴，包括畀謝天華踢爆少「萬歲」，最後佢都判「秦官」有罪，仲笑認係「仆街」添！
家輝哥直言對新劇有信心，事關台前幕後都有料到，仲話自己之後都會睇ViuTV追看，又爆老婆關詠荷追上癮，睇到佢隊冧天華嗰幕仲爆笑，不過就冇因此想復出拍劇喇！杏兒表示大仔Brendan鍾意玩槍，加上噚日生日，自己因工作陪唔到阿仔，所以今日帶埋阿仔嚟記者會「補數」。講到「胡說八道」好姊妹結婚，原來連杏兒只係早過公眾幾日知咋，連求婚都唔知，好秘密喎！
至於Rosa就周旋喺張兆輝同謝天華之間，兩位型佬笑談爭女經過，仲爆笑互窒。而Thor、珈其同肥腸就話為咗同家輝哥合作，唔收錢都肯，好彩最後有錢收啫！講到《膠戰S4》圓滿落幕，肥腸同珈其就話噚晚同台前幕後打邊爐時，已經跪求開《膠戰S5》，仲揚言唔收錢都拍喎！嘩！咁抵得諗咩？想知就睇足本訪問啦！
