【Viu】謝咏欣憑《但願人長久》喺「第四十二屆香港電影金像獎」再下一城，攞第三個最佳新演員獎，恭喜晒！頒獎禮後隨《但願人長久》團隊直落慶功，跟導演祝紫嫣、「爸爸」吳慷仁、Natalie許恩怡等切蛋糕、開香檳慶祝，場面熱鬧！
出爐最佳新演員謝咏欣話攞獎好開心，加上可以同團隊聚埋一齊溫馨又幸福！又冧爆話吳慷仁係最好嘅「爸爸」，仲踢爆媽咪偷落order：「佢話如果你真係有機會攞獎，你唔使多謝你自己爸爸，你多謝吳慷仁爸爸就得！」搞到吳慷仁笑到彎晒腰，而佢就笑「囡囡」太入戲，多謝佢嗰陣講咗佢戲入面個名「林覺民」，不過當吳慷仁聽到謝咏欣講「I Love You」嗰陣，即刻紅都面晒：「唔需要多謝我，係佢自己嘅努力！」又大讚「囡囡」好有天份，更指謝咏欣入戲後有影后張曼玉嘅氣質添！相信聽到呢個讚賞同攞獎一樣咁開心！唔知呢兩「父女」之後想挑戰咩角色呢？
另外，吳慷仁失落「最佳男配角」，佢話一啲都冇唔開心，因為一早有預感唔會攞獎，能夠入圍已經好開心！佢直言姜大衛係實至名歸，更獲對方鼓勵！而事前吳慷仁話最想搵謝君豪集郵，謝君豪隔空聽到呢件事，專登帶埋私伙相機，究竟有冇事成呢？嚟緊《但願人長久》嘅謝票安排又會係點？睇片咪知囉！
