【Viu】ViuTV新劇《哪一天我們會紅》即將啟播，一眾演員Marf@COLLAR、Day@COLLAR、岑珈其、麥沛東、楊偉倫，蘇振維、林宣妤、張毓軒、鄧濤、謝咏欣、黃溢豪、林熙彤、戴玉麒、陳琬瑜、李琛瑜等，今日晒冷現身造勢，堅係人才濟濟呀！
首次參演劇集嘅Day話好期待播出，笑指因劇中造型係學生妹look，喺片場成日獲禮遇！講到要同一班笑匠前輩合作，Marf同Day「大呻」每次對戲都好辛苦、好難忍笑！
香港電影金像獎日前順利舉行，Marf話好開心可以以多個身份參與盛事，覺得成個過程都好有儀式感，更可以一雪前恥頒「最佳美術指導」獎！雖然失落兩個獎項，但Marf話完全冇失望，入圍就當贏！
珈其、麥東、阿卵則超戥好兄弟朱栢康攞最佳男配角開心，揚言非佢莫屬添呀！佢哋更笑指朱康平時都係咁感性、眼淺，有冇好似Thor咁送「肉嘴」祝賀？依家同緊朱康排舞台劇嘅麥東即時笑言好大壓力，點解嘅？至於當晚喺劉嘉玲發言嗰陣，大嗌「梁朝偉都好靚仔」嗰個係咪珈其？
講返新劇，阿卵點被權力腐化？到底係邊位年輕演員沖咖啡畀佢飲？珈其同年輕演員合作有咩笑料？麥東同寵物鼠對戲有咩難忘事？佢飾演神經質YouTuber係向邊幾位神經質兄弟取經？想知就睇足本訪問啦！
