【Now新聞台】英格蘭超級聯賽，利物浦主場3比0大勝修咸頓，聯賽六連勝。
正選上陣的沙基利射中朗治浩治解不到圍，還將皮球撞入自己龍門，令利物浦10分鐘開紀錄。再來阿奴開角球給後上的祖馬迪頂入，時間是21分鐘，利物浦贏到2比0。
今場表現搶鏡的沙基利罰球射中楣底彈出，沙拿衝前白界前射入，半場補時利物浦已經鎖定3比0勝局，連同歐聯在內七連勝，是28年來開季最佳紀錄。
同樣大勝的還有曼城，作客升班馬卡迪夫城，憑阿古路32分鐘的入球領先。3分鐘後賓拿度施華接應辛尼，頭槌跣後未必有心，但「笠死」艾夫列治。
領先兩球的曼城臨完半場還有根度簡跟史端寧「撞牆」，再將皮球放入死角，是他今屆第一個英超入球。他不單只「開齋」，還於換邊後造就後備上陣的馬列斯為曼城射成4比0，上場歐聯意外不敵里昂，曼城回到聯賽大勝一場。
面對曼城壓迫，卡迪夫城的文加解圍都無力，得益的馬列斯射入他今場第二球，89分鐘為曼城鎖定5比0大勝。
同市的曼聯有手術之後，首次亮相奧脫福的費格遜到場打氣。18分鐘就見到曼聯領先，來自費特接應普巴的助攻射入，為紅魔鬼1比0領先狼隊，半場補時還差點拉開，但費特的罰球柏捷斯奧拍到再中門楣彈出。
連同聯賽盃已三連勝的狼隊，換邊後由祖奧莫天奴射破迪基亞1比1迫曼聯成功搶分。
