【A&M Diary】冰室：對於現代人嚟講，其實只係一個舊香港飲食文化嘅代名詞，而位於尖沙咀嘅保頓冰室，就將呢個代名詞演繹得淋漓盡致！由踏入餐廳，無論裝修設計定室內佈置，都令你置身昔日嘅香港，加上香噴噴嘅懷舊豬油撈飯，呢份復古感令人毫無違和感。
西多士
即叫即炸嘅西多士，炸到金黃香脆，夾心有勁多花生醬，再加上牛油同糖漿，邪惡得嚟又唔會太膩！
瑞士雞翼
雞翼煮到入晒味，瑞士汁鹹中帶甜，雞皮煮得啱啱好，唔會過腍，以保留口感。
沙嗲牛肉麵配紅腸午餐肉菠蘿包
沙嗲牛肉夠惹味，醬汁香濃，配埋紅腸同午餐肉之外，仲可以將普通多士升級做外脆內軟嘅菠蘿包。
