【A&M Diary】曾經何時，香港盛行集團連鎖式西餐廳，當時中學生嘅我哋，去呢啲餐廳食午餐，絕對係當時嘅一個高質指標。但經過時代洗禮，市場口味改變，當年嘅連鎖式西餐廳所剩無幾。而今日嚟到紅磡嘅紅蔥頭，重拾當年回憶之餘，估唔到味道都有驚喜。
法式香草牛油焗田螺
小食首推法式香草牛油焗田螺！田螺口感彈牙，但重點當然落在薯蓉之上，薯蓉夠香滑又creamy，仲吸晒田螺焗嘅精華添！
唐揚脆脆雞翼
雞翼即叫即炸，炸到金黃色，賣相一流！至於雞皮香脆而雞肉嫩滑，味道鹹香，夠晒惹味。
芝士焗肉醬千層麵
千層麵上面鋪上烘焗後嘅厚芝士，香濃之餘仲非常邪惡，正呀！而每層嘅千層麵都夾上一層肉，令口感非常豐富，加上芝士嘅點綴，教我如何不愛它？
鐵板薄西冷及雞扒
份量十足，兩塊扒經已佔據晒成個鐵板！配菜有薯條同雜菜，可以中和返肉嘅油膩感。牛扒同雞扒嘅熟成程度啱啱好，加上將薯條放底，令兩塊扒都唔會因為鐵板太熱而overcooked。
