【Now.com】首階段管制即棄塑膠產品星期一開始實施，商戶喺實踐過程中，應法例要求用各種方法落實「走塑」，轉用紙製替代品係主流辦法之一。不過，化學博士K Kwong (鄺士山) 就指出，紙張做嘅餐具有好多有害化學物，聲言唔會用。
呢幾日，不時聽到關於紙餐具夠唔夠硬淨嘅討論，K Kwong嘅著眼點就唔係紙刀叉係咪濕咗就變軟，而係擔心紙嘅安全性，紙餐具接觸食落肚嘅食物係咪OK？
K Kwong喺社交平台帖文話，「做過造紙廠嘅人都知紙用過好多酸 (H2SO4)、碱 (NaOH)、漂白劑 (Cl2，Cl2O，SO2)、螢光劑、防腐劑、fillers 先造到出嚟」，佢斬釘截鐵話，「一張紙有過百隻有害 chemicals」，佢唔會「食紙」，亦唔會用紙巾抹筷子、匙羹同碗。
K Kwong又指出，紙張本身會吸水，所以如果要防水就要加 coating，紙包飲品嘅 coating 有膠、鋁，「你用嘅紙餐具要防埋油同唔黐食物，亦有可能有 Teflon (有PFAS）。由於紙吸咗水就唔夠硬，所以又要加D filler，呢D filler 先冇皇管，因為常見嘅 fillers 如 CaCO3、TiO2、膠粒都唔係食用級。」至於木餐具，K Kwong話「木筷子、竹筷子有臭味，果D (嗰啲) 係二氧化硫，我都係被迫先用，臭㗎！」
相關新聞：
