【A&M Diary】無論係春天嘅祛濕湯水、夏天嘅消暑湯水、秋天嘅滋潤湯水、定係冬天嘅進補湯水，湯真係唔少得！不過，作為繁忙嘅都市人，煲湯對我嚟講又好似有一個距離，但出街飲湯，最重要係足料無味精，所以今晚就去到土瓜灣嘅飲多兩盅，晚餐由一碗靚湯開始。
節瓜眉豆雞腳湯
飲多兩盅嘅原盅靚湯每日都唔同，今日就揀咗節瓜眉豆雞腳湯，湯入面有2大隻雞腳，配料十足，重點當然係完全無味精啦！
海底椰川貝燉雪梨湯
想滋潤一下嘅，今晚老闆娘就推介海底椰川貝燉雪梨湯！燉湯嘅味道係比較濃，睇得出湯嘅顏色都比較深色，一樣湯料十足，每飲一啖都feel到個湯嘅所有精華都已經燉晒出嚟，飲完個喉嚨真係好滋潤啊！
鹹香雞髀飯
除咗湯之外，呢度仲有各式各樣嘅主菜。呢個鹹香雞髀飯隻雞髀大大隻，而餐廳為咗方便大家，已經好細心咁切開一件件。雞髀肉帶有淡淡嘅鹹味，唔會太鹹，係家嘅味道。
燒賣
燒賣新鮮即叫即蒸，而蝦肉好彈牙，配埋豉油一齊食，好好味！
