眾港將上下一心。
(@Now Sports)
【Now Sports】三項鐵人世界盃香港站本周日上演，大會今日舉行記招，港隊代表及各國世界級好手均有出席。
今次三項鐵人世界盃2024香港站中高手雲集，將有現世界排名15、杭州亞運金牌的日本選手尼拿賢治，亦有由美國遠道而來，東京奧運個人賽第6名並替美國隊奪得混合接力銀牌的麥道維；港隊將派出現時亞洲「三哥」伍泰龍為首的隊伍出戰。
至於女子組同樣競爭激烈，香港「一姐」彭詩雅將主場迎戰來自美國的東京奧運個人銅牌及混合接力銀牌得主薩菲爾斯。同場亦有久休復出，來自英國的里約奧運個人賽銅牌得主海倫，以及上屆亞洲錦標賽冠軍哈薩克的莎巴蓮拿。
日本選手尼拿賢治今日受訪時笑言：「我已經留咗喺香港12日，因為好多時間喺沙田體院練習，間唔中出去行下，好享受喺香港嘅遊覽，真係唔錯。」產後復出的海倫被問及現時狀態則稱：「100%準備好，生完小朋友之後嘅狀態都好好，但要留低只有1歲左右嘅小朋友嚟香港比賽，係一個艱難決定。」
美國好手麥道維則指，作賽單車出現零件故障，慶幸得到本地的工作人員熱心幫手下，問題得以解決。
至於港將伍泰龍坦言對手不易應付：「今次係喺香港比賽以嚟難度最高嘅賽事，因為有好多喺我後生嗰陣就聽過嘅選手，每個都係世界級運動員，並唔容易對付。」又稱早前交通意外的受傷已經幾乎痊癒，期望周日賽事能展現最好的狀態。
賽事以中環灣仔海濱長廊為起步點，先於維港游750米，上岸後沿博覽道、國際金融中心、以至中環碼頭繞5圈共20公里的單車，最後途經政府總部及立法會等地標一帶跑兩圈共5公里，並於金紫荊廣場衝線。